Mourning De’Mathew. (GUCAKAYA DE’MATHEW)

Ndamenyire uhoro wa kuhuruka gwaku iyo, Mwanjiririo mathaa ma ruciine. Ni ndumiriri ndamukirire na ngoro nditu. Niwandakaririe muno ni guthii oo uguo ta mundu wa kawaida indi urari njamba kionereria. Ndiambire guitikia na kureka uhoro ucio urikire tondu ti uhoro mwega. Ndakinya kuria turutaga wira nindanjirie wira o ta mutugo, no gikeno giakwa gitigana gukinyanira. Ngiciria nyingire nendaini ya Facebook na niguo ndanjirie guitikira ati niwahuruka.

Nindaiguire kurakara muno. Ndemethio niwarakaria aingi niguthii. Niguthie utuku ta kiguoya na turoe urari njamba karau. Niwaruaga mbara nene hindi iria urari muoyo no wakua o uguo. Ona mugumo ukigua niuraramaga no we wagua ta muramba wa irigu. Na wakigua hindiria irigu riakuhiriria kuiruha. O hindi njata yaku irari na utheri mwega utekumenukamenuka.

Nindaiguire ta Mwenenyaga akugira tene. Hwaini ucio wa Mwanjiririo nindaremirwo niguthikiriria kameme ona kariku ga Gikiyu tondu no macakaya mangiandungire. Ngikira nyimbo ciaku ciika kinandaini nigetha nguigue wi hakuhi. Ngoroini yakwa ndwatutigite.

Hindiria nyimbo ciaku ciainaga kinandaini nindacithikiririe na ugaciru munene ma. Ni Sindii yari na nyimbo cia wendo na mataro. Thiini wayo ni Nyimbo ta Pin Number, Muoyo ti Kibandi, Wendo wa Matiribu, Kanua ke Mata na ingi nyingi. Nindacokire ngithikiriria Mwendwa Nduku, Wendo Umaga Kuraya na Ngoro Gitina.

Urathi

Ninguitikania na atongoria aingi a uteti aria marauga ati wiini waku wari urathi. Niwatara andu a nyumba ya Mumbi utekumathaitha kana kuhakirira. Rwimbo ta Kahii na Ruthanju niwatukanirie kugia na uthu na Meera. Nyimbo ici waina thuthaini ta Wendo Umaga Kuraya na Ngoro Gitina nicianjikirire ihoru inene tondu ciina urathi wa kuhuruka gwaku. Ni hinya mundu muno muno muini gucokeria andu ngatho na gitio na wendo munene; kinya gutunga rwimbo rugima rwa ngatho atari mukuru muno wa kurikia wiini. Nyingi gucoka kuinira nyina wa ciana ciaku, gucunga muhera na kumuririkania niumwendete ni uhoro uranjikira ciuria nyingi.

Wendo

Korwo hee undu wagutigithukania na aini angi ni uria waina uhoro wa wendo. Nyimbo ciaku cia wendo nicindathimaga muno tondu citire waganu na no thikiririe na aciari. Ni nyimbo cirataura wendo ta kiheo kuma kwi ngai, ta gitumi gia gutura muoyo. Nyingi ni waria uhoro wa wendo gatagatiini ka athoni na ningenagio ni haria ugaga ‘Muthuri wa My Sister’. Ni waina na gutongoria ikundi cia aini a ruthiomi rwa Gikuyu ukimoria na kumomiriria manyitane na mateithanie. Rwimbo rwaku, Umenagira kii na tutiri rugira, ni rwa bata muno.

Uteti

Hee hindi imwe ndakirite ngoria nikii Ithe wa Ciku atangirugama giti kia uteti. Utauku waku wa maundu ma bururi ni muriku wega na kirindi ni wooe gukiohithania. Ninjui niundu wa nyimbo ciaku citathitukanagia mundu ni mauthe niciakugucagiriria arata na thuu muigananiria. Nyingi Munabii ndatuikaga Muthamaki.

Niwathie naihenya

Ona angikorwo ni kuenda kwa Ngai, De’Mathew niwathie naihenya. Ndi munini ngikura nindathikagiriria nyimbo ciaku ta Nengerereria Kane, Nyoni ya Njamba, Njata Yakwa na ingi nyingi. Imwe ndiari na gukuukirwo kana umenyo no onagukiri o uguo ndaciendete muno. Ndaneneha niguo ndaciendire makiria. Ni ndirari na meririria ma gukanathie ndumo imwe yaku nigetha nguone maitho kwa maitho. Njoke no ndendaga gukuria kiuria kana no twandike ibuku ria muoyo waku kuma wii munini na ruthiomi rwa Gikuyu. Ni meriria matanahinga.

Koma thayu

Ninjui kihuruko giaku ti Mutino no ni kwenda kwa Ngai. Ngai onake ndangithura uthie gwake umuinagire. Riu ninjui ni wohithanio na aini aria angi mahurukire na oho wacemania na mwendwa waku Nduku. Niwatiga ithenya inene muno ritangiihurio ni mundu umwe. Niwatutiga tutari na Muriithi mukinyaniru, mutauri wa maundu na mutari wa kirindi.Rwimbo rwaku rwa Muthuri ni riitho ria Ngai ni rwanyonia uria twatiguo ni njamba hee umenyo na ugii ni Ngai.

Wira waku ndunathira, tugukuria urie Ngai ndagatutige uguo.

Ni Ngai wakuheanire John Ng’ang’a De’Mathew na nowe wa kuiyira, rwitwa riake rirogocwo. Huruka uhoro.

Post Author: Thuku Muthui

2 thoughts on “Mourning De’Mathew. (GUCAKAYA DE’MATHEW)

    Jose

    (August 21, 2019 - 7:08 am)

    Njamba to De Matthew egûtûra aririkanagwo ni kûaria ûhoro cararûku ategucunga nigetha akenie mûndû. Njamba ya rûrîrî!!!! Nîî ahurûke thayû

      Thuku Muthui

      (August 21, 2019 - 7:38 am)

      Ni ma..Aromama kwega kuraga

Leave a Reply

Your email address will not be published. Required fields are marked *